ເວທີ ແລກປ່ຽນຂໍ້ມູນ-ຂ່າວສານ ຂອງ ລັດຖະບານ ສປປ ລາວ ນຳສະເໜີເຄື່ອງມືທີ່ມີຄວາມສະດວກ ໃນການຄົ້ນຫາ, ວິເຄາະ ແລະ ດາວໂຫຼດ ຂໍ້ມູນ ທີ່ເຊື່ອມສານ ແລະ ແລກປ່ຽນກັນລະຫວ່າງ ຂະແໜງການຕ່າງໆຂອງລັດຖະບານ ຢູ່ ສປປ ລາວ. ເວທີ ແລກປ່ຽນຂໍ້ມູນ-ຂ່າວສານ ດັ່ງກ່າວນີ້ ສາມາດຊ່ວຍເປັນບ່ອນອີງໃຫ້ແກ່ ການວາງແຜນ ແລະ ການຕັດສິນບັນຫາ ເພື່ອສົ່ງເສີມການຄຸ້ມຄອງທີ່ດິນແບບຍືນຍົງໃຫ້ເປັນເອກະພາບ ທັງເປັນການອະນຸລັກ ແລະ ປົກປັກຮັກສາຄວາມອຸດົມສົມບູນຂອງຊັບພະຍາກອນທຳມະຊາດ ຂອງປະເທດ.
ເວທີດັ່ງກ່າວໄດ້ຖືກພັດທະນາເປັນສ່ວນຫນຶ່ງຂອງໂຄງການຄວາມຮູ້ເພື່ອການພັດທະນາ (K4D), ໄດ້ຮັບການສະຫນັບສະຫນູນດ້ານວິຊາການໂດຍ ສູນເພື່ອການພັດທະນາ ແລະ ສິ່ງແວດລ້ອມ (CDE) ຂອງມະຫາວິທະຍາໄລ Bern, ໂດຍໄດ້ຮັບທຶນຊ່ວຍເຫຼືອຈາກ ອົງການເພື່ອການພັດທະນາ ແລະ ການຮ່ວມມືສະວິດ (SDC). ລະບົບດັ່ງກ່າວຈັດເກັບ ແລະ ຄຸ້ມຄອງໂດຍກະຊວງກະສິກໍາ ແລະ ປ່າໄມ້ (MAF), ແລະ ຊຸດຂໍ້ມູນຂອງແຕ່ລະຂະແໜງການ ແມ່ນຖືກສະໜອງ ແລະ ຄຸ້ມຄອງໂດຍຫ້ອງການ ແລະ ກະຊວງທີ່ກ່ຽວຂ້ອງ.