ການປ່ຽນແປງຄວາມປົກຫຸ້ມທີ່ດິນ ແລະ ການນຳໃຊ້ທີ່ດິນທີ່ເກີດຈາກການລົງທຶນໃນຂົງເຂດທີ່ດິນ ເພື່ອເປົ້າໝາຍທາງດ້ານການຄ້າ ຢູ່ ສປປ ລາວ: ໂອກາດໃນການປັບປຸງການຄຸ້ມຄອງໃຫ້ດີຂື້ນ

ລັດຖະບານ ສປປ ລາວ ໄດ້ສົ່ງເສີມ ແລະ ຖືເອົາການລົງທຶນໃນຂົງເຂດທີ່ດິນ ເພື່ອເປົ້າໝາຍທາງດ້ານການຄ້າ ເປັນຍຸດທະສາດໃນການພັດທະນາປະເທດຊາດ. ຕໍ່ບັນຫາດັ່ງກ່າວ, ມັນໄດ້ມີການປ່ຽນແປງທາງດ້ານການນຳໃຊ້ ແລະ ການປົກຫຸ້ມເນື້ອທີ່ດິນ. ເຊິ່ງໃນພາກຈັດຕັ້ງປະຕິບັດຕົວຈິງ ຖືວ່າຍັງບໍ່ທັນໄດ້ຮັບຄວາມເຂົ້າໃຈຢ່າງຈະແຈ້ງ ແລະ ກວ້າງຂວາງເທົ່າທີ່ຄວນ. ເປັນຕົ້ນແມ່ນແນວທາງການຈັດຕັ້ງປະຕິບັດ ທີ່ຕິດພັນກັບວຽກງານການຫັນປ່ຽນຂອງປ່າໄມ້ ແລະ ດິນກະສິກຳ. ເຖິງແມ່ນວ່າ ການຂະຫຍາຍຕົວຂອງເສດຖະກິດ ໄດ້ອີງໃສ່ການລົງທຶນໃນຂົງເຂດທີ່ດິນເພື່ອເປົ້າໝາຍດ້ານການຄ້າ ຖືເປັນບູລິມະສິດຂອງລັດຖະບານກໍຕາມ, ໃນຕົວຈິງ ເຫັນໄດ້ວ່າມີບາງບັນຫາ ທີ່ຍັງຂັດແຍ່ງກັບເປົ້າໝາຍການພັດທະນາດ້ານອື່ນໆ. ເປັນຕົ້ນແມ່ນ ທາງດ້ານການຄຸ້ມຄອງບໍລິຫານ ແລະ ການປົກປັກຮັກສາປ່າໄມ້, ການຄໍ້າປະກັນສະບຽງອາຫານແຫ່ງຊາດ, ການຂະຫຍາຍຕົວທາງດ້ານການຜະລິດກະສິກໍາເພື່ອເປັນສິນຄ້າ, ການຜະລິດພະລັງງານ ແລະ ການພັດທະນາຊົນນະບົດ.

ລະບົບຂໍ້ມູນກ່ຽວກັບ ການປ່ຽນແປງການນຳໃຊ້ ແລະ ການປົກຫຸ້ມຂອງເນື້ອທີ່ດິນ, ຮວມເຖິງການເກັບກຳ ແລະ ການວິເຄາະຂໍ້ມູນ ມັນມີຄວາມຈຳເປັນທີ່ຈະຕ້ອງໄດ້ຮັບການປັບປຸງໃຫ້ດີຂຶ້ນກວ່າເກົ່າ ເພື່ອຊຸກຍູ້ໃຫ້ແກ່ການຕັດສິນບັນຫາ ແລະ ເປັນບ່ອນອີງ ໃຫ້ແກ່ການວາງນະໂຍບາຍ ໃນການ ດຸ່ນດ່ຽງ ເປົ້າໝາຍການພັດທະນາຂອງລັດຖະບານ. ໃນປະຈຸບັນ ສິ່ງທີ່ສຳຄັນທາງດ້ານການລົງທຶນໃສ່ເນື້ອທີ່ດິນ ເພື່ອເປົ້າໝາຍທາງດ້ານການຄ້າ ຖືວ່າຍັງຢູ່ໃນໄລຍະຂອງການຊອກຄົ້ນ-ສຳຫຼວດ ເຊິ່ງມັນຮຽກຮ້ອງໃຫ້ມີມາດຕະການທີ່ສອດຄ່ອງ ແລະ ເໝາະສົມ ເພື່ອປ້ອງກັນບໍ່ໃຫ້ເກີດມີສະພາບການປ່ຽນແປງຂອງການນຳໃຊ້ ແລະ ການປົກຫຸ້ມເນື້ອທີ່ດິນ ທີ່ມີລັກສະນະບໍ່ຍືນຍົງ ພ້ອມທັງເປັນການສະໜັບສະໜູນໃຫ້ແກ່ການຈັດຕັ້ງປະຕິບັດແຜນແມ່ບົດແຫ່ງຊາດ ດ້ານການຈັດສັນທີ່ດິນ ໃຫ້ປະສົບຜົນສຳເລັດ ອີກດ້ວຍ.

ດາວໂຫຼດເອກະສານສະບັບເຕັມ